O‘zbеkiston Rеspublikаsi Ichki ishlаr vаzirligi

Joriy yilning 30-may – 1-iyun kunlari Turkiyaning Bursa shahrida sportning qoʻl jangi turi boʻyicha Jahon chempionati musobaqasi boʻlib oʻtdi. Unda jahonning 32 ta davlatidan 300 nafarga yaqin sportchi ishtirok etdi va yuksak mahorat hamda iroda bilan oʻzaro bellashdi.

Musobaqa yakuniga koʻra, Oʻzbekiston terma jamoasi umumjamoa hisobida faxrli 1-oʻrinni egallab, mamlakat bayrogʻini yana bir bor xalqaro maydonda baland koʻtardi. Sportchilarimiz tomonidan jami 8 ta oltin, 3 ta kumush va 3 ta bronza medali qoʻlga kiritildi. (2-oʻrinni Rossiya, 3-oʻrinni Qozogʻiston jamoalari egalladi.)

Ushbu nufuzli musobaqada milliy terma jamoa tarkibida qatnashgan Jizzax viloyati Ichki ishlar boshqarmasi Jamoat xavfsizligi xizmati Yoʻl harakati xavfsizligi boshqarmasi yoʻl-patrul xizmati inspektori, safdor Siroj Nazarmatov oʻz vazn toifasida barcha raqiblarini magʻlub etgan holda faxrli 1-oʻrinni egalladi va oltin medalga sazovor boʻldi.

Shuningdek, Jizzax viloyati Zomin tumani Ichki ishlar boʻlimi huzuridagi tergov boʻlimi Jinoyatlarni tergov qilish boʻlinmasi tergovchisi, leytenant Umid Nishonov ham munosib ishtirok etib, musobaqa finalida jonkuyarlik bilan kurash olib bordi va faxrli 3-oʻrinni egallab, bronza medali bilan taqdirlandi.

Oʻzbekistonning xalqaro musobaqalardagi bunday muvaffaqiyatlari mamlakatimizda sportni ommalashtirish, xizmatchilarning jismoniy tayyorgarligini yuqori darajada saqlash hamda ularning intellektual va ruhiy salohiyatini yuksaltirish yoʻlidagi islohotlar samarasi ekanligini yana bir bor tasdiqlaydi.

Terma jamoamizning gʻalabasi millatimiz uchun katta faxr manbaiga aylandi.

Oʻzbekiston delegatsiyasi aʼzolari Toshkent xalqaro aeroportida tantanali ravishda kutib olindi.